Tíðindaskriv/Bókadeild Føroya Lærarafelags
– 70 ára hátíðarhald hjá Bókadeild Føroya Lærarafelags
Í sambandi við at Bókadeild Føroya Lærarafelags fyllir 70 ár í ár, skipa Lærarafelagið og Bókadeildin fyri almennum hátíðarhaldi við fyrilestrum, upplestri, tónleiki og ábiti í Finsen á altjóða læraradegnum 5. oktober kl. 13.00-17. Øll eru vælkomin.
Dagurin verður skipaður í tvey tiltøk, sum hanga saman. Tað fyrra við framløgum um føroyskar barna- og ungdómsbøkur, og tað seinna sum 70 ára móttøka.
Barna- ungdómsbøkur á føroyskum kl. 13.00 – 14.45
- Vælkomin og upplegg um Bókadeild Føroya – Sigfríður Sólsker, stjóri á Bókadeild Føroya Lærarafelags
- Søgan hjá Bókadeildini – Niels Jákup Thomsen, fyrrverandi stjóri á Bókadeild Føroya Lærarafelags
- Upplestur – Ingun Christensen
- Føroyskar barnabókmentir í dag – Paula Gaard, phd í bókmentafrøði
- Upplestur – Rakel Helmsdal
- Takk fyri – Jacob Eli S. Olsen, formaður í Lærarafelagnum
Móttøka – Bókadeild Føroya Lærarafelags 70 ár kl. 15.00
- Vælkomin – Sigfríður S. Sólsker og Jacob Eli S. Olsen
- Ábit
- Upplestur – Elin á Rógvi
- Rithøvundavitjanir verða kunngjørdar
- Avdúking
- Marius Ziska spælir nøkur løg
Rithøvundavitjanir í føðingardagsgávu
Eitt, sum kann gera stóra munin fyri lesigleðina hjá børnum og ungum, er at hitta rithøvundin. Í sambandi við at Bókadeild Føroya Lærarafelags fyllir 70 ár í ár gevur Føroya Lærarafelag tíggju skúlaflokkum møguleikan at fáa rithøvundavitjan í vetur. Rithøvundavitjanin er ókeypis, hon er ein føðingardagsgáva til næmingar og lærararnar í Føroyum.
Rithøvundarnir, sum koma at vitja skúlaflokkarnar, hava allir givið upprunaføroyskar bøkur út hjá Bókadeild Føroya Lærarafelags. Tey eru: Betta á Dalinum, Oddfríður Marni Rasmussen, Dánial Hoydal, Urd Johannesen, Elin á Rógvi, Silja Aldudóttir, Rakel Helmsdal, Ingun Christensen, Marjun Syderbø Kjelnæs og Elin Michelsen.
Skúlaflokkar kunnu søkja um at fáa eina vitjan og siga hvønn rithøvund, tey vilja hava. Síðan verður lutakast millum innkomnu umsóknirnar. Á hátíðarhaldinum á Finsen verður kunnað, hvørjir skúlaflokkar eru so hepnir at fáa ein rithøvund á vitjan.
Bókadeildin
Bókadeild Føroya Lærarafelags er eitt forlag, ið gevur út barna- og ungdómsbøkur. Bókadeildin gevur umleið 70 bøkur út um árið. Hetta er bæði bøkur, ið eru útvaldar og týddar til føroyskt, umframt upprunaføroyskar bøkur. Í 2026 gevur Bókadeildin 14 upprunaføroyskar bøkur út, sostatt eru heili 21% av ársins 65 útgávum upprunaføroyskar. Harumframt gevur Bókadeildin út barnabløðini Strok og Píka7, fakblaðið Skúlablaðið og poddvarpið Ung lesa.
Ólavsøkudag í 1956 settu lærarar Bókadeild Føroya Lærarafelags á stovn, tí ynski var at fáa fleiri bøkur á føroyskum til børn og ung, og týdningurin at hava barna- og ungdómsbøkur á føroyskum er eins stórur í dag, sum hann var tá. Tí er tað alneyðugt, at vit hava eitt sterkt og virkisført barnabókaforlag í Føroyum at geva bøkur út á føroyskum, so børn og ung fáa bókmentir á høgum støðið, ið eru í eygnahædd við viðkomandi list og mentan, so at vit nú og í framtíðini hava eitt livandi mál.
Á Bókadeildini starvast umframt stjóran, tríggir ritstjórar, eitt marknaðarfólk og blaðstjórin á barnabløðunum.
Bókaklubbin
Bókaklubbin hjá Bókadeild Føroya Lærarafelags var settur á stovn í 1986. Endamálið tá og nú er at geva fólki høvi at ogna sær bíligar bøkur, av tí at tað fáa staðni í landinum vóru og enn eru bókhandlar. Í dag eru omanfyri 2000 limir í Bókaklubbanum, harav fleiri enn 300 av limunum búgva uttanfyri Føroyar. Limir fáa bøkur sendandi sjey ferðir um árið við ókeypis flutningi. Stuðulsavtalur við Føroya banka, Lív og Smyril Line gera, at tað er ókeypis útbering fyri allar limir, sama hvar á knøttinum, teir búgva.
Deil á Facebook
