Í dag sita tvey stolt foreldur heima við hús á Geytagøtu í Norðragøtu. Gjárdagurin er farin afturum, og kenslurnar hava fingið tíð at lagt seg eitt sindur.
Í gjárskvøldið varð støðan tó eitt sindur øðrvísið og meira spent og rokalig heima hjá teimum.
Tá sótu tey bæði, saman við dóttrini Fanni og unnusta hennara, í køkinum og hugdu (og blundaðu), meðan sonurin spældi størsta dystin í hansara yrkisleið higartil.
-Vit eru sera stolt av honum, tí hetta er nakað sum hann altíð hevur miða ímóti. Hann hevur eisini arbeitt hart og miðvíst fyri at røkka hertil sum hann nú er komin. Hann hevur altíð sett sær stór mál innan fótboltin. Og hetta er vónandi eitt stig á vegnum, siga tey við ein munn.
Sonurin, Géza Dávid Turi, eisini kallaður “lítii Géza”, flutti úr Sarpugerði og Víkingi, til enskan fótbólt í januar í ár.
Í gjár var hann saman við liðfeløgunum úr Grimsby Town, í dysti ímóti sjálvum fótbóltsrisanum í enskum fótbólti, Manchester United, í Carabao Cup steypakappingini.
Géza byrjaði á bonkinum, men varð skiftur inn í 64 minutti. Dysturin endaði við javnleiki 2-2 og tískil mátti brotssparkskapping til fyri at finna ein vinnara.
Tá ið fyrstu 5 brotsspørkini vóru skotin av hvørjum liðið, stóð enn á jøvnum. So varð farið í sokallað “sudden-death” brotsspørk, har skotið var til annar parturin brendi.
Sjeynda brotssparkið skeyt Géza sjálvur trygt í málið, til vinstru hjá málverjanum André Onana.
-Tá var hjarta nærri hálsinum og nervarnir vóru úti og reikaðu, siga tey við einum smílið.
Sjálv brotssparkskappingin tók heili 18 minuttir at avgreiða, áðrenn Grimsby Town, heilt óvæntað, dró longsta stráðið og slerdi stórliðið úr Manchester út úr kappingini.
Ein tann størsta sensatiónin í enskum fótbólti í nýggjari tíð. Nakað sum ger at sonur teirra nú hevur skrivað seg sjálvan inn í søgubøkurnar.
Lítli Géza fekk í fjør danskt/føroyskt pass, sum ger, at hann nú er føroyskur/danskur ríkisborgari. Nakað sum ger, at hann eisini er háaktuellur til sínar fyrstu minuttir á føroyska A-landsliðnum, sum skal møta Kroatia og Gibraltar komandi vikuna.
Pápin, Géza Tamás Turi og mamman, Zsuzsanna Nagy, eru tó bæði ungarar av uppruna, men hava búð í Føroyum og í Gøtu í næstan 20 ár.
“Stóri Géza”, flutti upprunaliga til Føroyar í 2006 fyri at spæla fótbólt við GÍ. Áðrenn tað hevði hann leikt yrkisfótbólt í ungarskum fótbólti.
Minnisríkasta løtan hjá honum varð uttan iva, tá ið hann varð skiftur inn á Old Trafford móti Manchester United í Champions League dysti fyri ungarska lið sítt Zalaegerszegi tann 27 august 2002.
Merkisvert er tó, at sonurin, “lítli Géza,, akkurát 23 ár seinni, á sama degi, tann 27 august, eisini leikti móti Manchester United.
Hann, pápin, sigur við einum smílið, at hann minnist ringt afturá fyrstu ferð hann kom til landið í januar mánaða í 2006. Tað var sera kalt og stórkavi. Hann var komin til eitt fremmant land sum hann als einki visti um, so ella so. Hann hevði mestan hugin at venda við aftur.
Hann sigur, at eingin stóð á flogvøllinum og tók ímóti honum tá ið hann lendi í Vágunum. Og at tað vóru sera vánalig koyrilíkindi tann dagin og næstan ikki koyrandi av flogvøllinum og til Gøtu.
Men til alla lukku, so misti hann ongantíð mótið og restin er søga, sum tey siga.
Og er í dag, saman við konuni, eru tey bæði mest sum lokalar bygdamyndir í Eysturkommunu, har tey stórtrívast millum bygdafólkið.
Deil á Facebook
