Fótbóltssamband Føroya
FSF hevur longt sáttmálan við Eyðun Klakstein, sum sostatt heldur fram sum høvuðsvenjari hjá føroyska manslandsliðnum til og við 2029. Somuleiðis eru sáttmálar gjørdir við hinar í venjaratoyminum, Atla Gregersen, Magna Mohr, Jákup Reinert Højgaard og Géza Tamás Turi.
Við avgerðini tryggjar Fótbóltssamband Føroya sær framhald og støðufesti kring A-landsliðið hjá monnum komandi árini. Venjaratoymið hevur síðstu tíðina arbeitt miðvíst við at byggja upp eitt sterkt landsliðsumhvørvi, og tað arbeiðið skal nú halda fram.
– Vit eru sera fegin um, at tað hevur eydnast at leingja samstarvið við Eyðun og restina av venjaratoyminum. Teir hava víst stórt arbeiðssemi og fakliga dygd, og vit hava álit á, at teir kunnu halda fram við menningini av føroyska manslandsliðnum, sigur Christian Andreasen, forseti í FSF.
Eyðun Klakstein fegnast um nýggja sáttmálan.
– Tað er ein stórur heiður at sleppa at halda fram sum landsliðsvenjari. Eg eri takksamur fyri stóra álitið frá FSF og glaður fyri, at vit halda fram við sama venjaratoymi. Vit gleða okkum til uppgávurnar, sum liggja fyri framman, sigur Eyðun Klakstein.
Við nýggja sáttmálanum verður tryggjað, at sama venjaratoymið heldur fram á manslandsliðnum.
Venjaratoymið
– Eyðun Klakstein, høvuðsvenjari
– Atli Gregersen, hjálparvenjari
– Magni Mohr, kropsligur venjari
– Jákup Reinert Højgaard, greinari
– Géza Tamás Turi, málmansvenjari
Deil á Facebook
