Umleið 200 fólk savnaðust um vitlíki og kappingarføri í Løkshøll

Mynd: Eyp.fo

Vinna, tøkni og fótbóltur møttust, tá Eysturoyar Vinnulívsfelag í dag setti sjóneykuna á, hvussu vitlíki kann skapa virði og styrkja føroyskar fyritøkur.

Umleið 200 fólk vóru savnað í Løkshøll í Runavík í dag, mikudagin 28. oktober, til ráðstevnuna »Vitlíki og kappingarføri hjá vinnuni«. Millum luttakararnar vóru bæði vinnulívsfólk, politikarar og onnur áhugað.

Vitlíki og kappingarføri vóru á breddanum í Løkshøll í dag. Mynd: Eyp.fo.

Eysturoyar Vinnulívsfelag skipaði fyri árligu ráðstevnuni. Á skránni vóru framløgur frá Bakkafrost, Kodio og GroAqua um vitlíki í vinnuni, umframt ein framløga frá Eyðuni Klakstein um nýtsluna hjá føroyska manslandsliðnum í fótbólti.

Formaðurin í Eysturoyar Vinnulívsfelag bjóðaði vælkomin

Tiltakið byrjaði við at Suni Justinussen, formaður í Eysturoyar Vinnulívsfelag, bjóðaði áhoyrarunum vælkomin.

Síðani vóru tað Høgni Dahl Jakobsen fíggjarstjóri á Bakkafrost, sum greiddi frá evninum »Kappingarføri og produktivitetur í einum nýggjum veruleika«.

Honum á baki var Ólavur Simonsen, menningarleiðari hjá Kodio, sum hevði framløgu um vitlíki í arbeiðnum hjá fyritøkuni.

Leif Johannesen umboðaði GroAqua og greiddi frá vitlíki í arbeiðnum hjá fyritøkuni, sum heldur til á Kambsdali.

Og síðan var tað Kristian Eli Zachariassen, KT-leiðari á Bakkafrost, sum hevði framløguna »Frá vitlíki til ítøkiligt virði«. Her var evnið sambandið millum nýggja tøkni og nyttu í fyritøkuni.

Eyðun Klakstein um vitlíki á A-landsliðnum

Síðstur at leggja fram var Eyðun Klakstein, venjari hjá føroyska manslandsliðnum í fótbólti, har hann gav ráðstevnuni eitt ítróttaligt sjónarhorn. Evnið var, hvussu A-landsliðið nýtir vitlíki til strategiskt arbeiði, dystarfyrireikingar og greiningar.

Ráðstevnuevnið í dag liggur nær einum av høvuðsendamálunum hjá Eysturoyar Vinnulívsfelag: nemliga at stimbra kappingarførið hjá vinnuni í lokaløkinum.

Í innbjóðingini legði felagið dent á, at tøkniliga menningin gongur skjótt, og at fyritøkur mugu taka støðu til, hvussu tær vilja nýta vitlíki nú og í framtíðini.

Frá føroyskum aliringum til landsliðsfótbólt

Ráðstevnan fevndi sostatt víða. Á skránni vóru bæði framleidni hjá stórum fyritøkum, talgildar arbeiðsuppgávur, fóðring í alivinnuni og fyrireiking til landsdystir. Tey umleið 200 fólkini í Løkshøll fingu høvi at hoyra um vitlíki úr fleiri ymiskum sjónarhornum og at hittast tvørtur um vinnugreinar og áhugamál.