Tíðindaskriv
Í sambandi við altjóða ruddingardagin í september skipar Rudda Føroyar fyri temakvøldi í Norðurlandahúsinum mánakvøldið 2. september kl. 18.00-21.00. Í høvuðsheitum snýr temakvøldið seg um at broyta vanar, endurnýta meira og tveita minni burtur.
Á skránni er ein framsýning í forhøllini og ein røð av spennandi framløgum í Skálanum.
Hetta temakvøld er ein liður í at varpa ljós á yvirskipaða endamálið hjá Rudda Føroyar at fáa ein reinan, sunnan og ruskleysan heim. Skráin fyri kvøldið fevnir breitt og vendir sær bæði til einstaklingar og fyritøkur. Temakvøldið skal eisini síggjast sum upptakt til altjóða ruddingardagin 21. september, har umleið 20 milliónir fólk um allan heimin rudda í senn.
Norðurlandahúsið, Hiddenfjord, Betri Stuðul og Umhvørvismálaráðið hava stuðlað tiltakinum.
Atgongumerki og meira kunning um tiltakið fæst á heimasíðuni hjá Norðurlandahúsinum: https://www.nlh.fo/?event=10877/rudda-foeroyar-temakvoeld
Deil á Facebook
