Fótbóltssamband Føroya
Eini 50 kvinnur tóku lut og lýddu á, tá FSF leygardagin bjóðaði til netverkstiltakið “Finn tína leið”.
Salurin var so gott sum fullur, tá Andrea Vatnsdal og Mary-Ann Zachariassen vóru høvuðsnøvn til netverkstiltak í FSF húsinum sum upptakt til finaluna um Løgmanssteypið. Við áhugaverdum og inspirerandi eygleiðingum úr teirra egna lívi í fótbólti, góvu tær báðar áhoyrarunum innlit í, hvussu fótbólturin hevur ríkað teirra lív, bæði persónliga og í arbeiðshøpi.
Andrea Vatnsdal er post-intro skurðlækni á Landssjúkrahúsinum, umframt at hon eisini virkar sum landsliðslækni hjá A-kvinnum. Í síni framløgu hugleiddi Andrea fyrst um barnaárini sum spælari í VB, har samanhaldið og mongu túrarnir norður um Suðuroyarfjørð góvu henni nógvar góðar lívsførleikar í viðførið. Síðan greiddi hon frá vaksnu árunum við lesnaði og lívinum á síðulinjuni, meðan maður hennara Heini spældi yrkisfótbólt. Síðan 2022 hevur Andrea verið lækni á kvinnulandsliðnum, og í framløguni fortaldi hon sera áhugavert um, hvussu royndirnar sum landsliðslækni eisini hava styrkt hana fakliga í dagliga yrkinum á Landssjúkrahúsinum.
Mary-Ann Zachariassen starvast sum lærari og serlærari, og so hevur hon spælt óteljandi dystir í bestu føroysku deildini. Dystartalið veksur framvegis, tí hon er enn virkin sum ÍF spælari. Harumframt hevur hon fleiri stórar álitisuppgávur í felagnum, eitt nú sum samskipari, venjari, hjálparfólk og nevndarlimur. Í sínari framløgu greiddi Mary-Ann sera væl frá, hvussu fótbóltur fyri hana og familjuna er ein sterkur miðdepil – eitt áhugamál, sum savnar tey og gevur teimum felags upplivingar og kvalitetstíð.
Netverkstiltakið “Finn tína leið” er eitt átak til frama fyri at økja um talið av kvinnum í føroysku fótbóltsfamiljuni. Umframt leiklutirnar sum spælarar, venjarar og dómarar, so eru vegirnir í fótbólti ógvuliga talríkir og áhugaverdir, og tiltakið hevur til endamáls at sjónliggera kvinnuligar fyrimyndir í fjølbroyttum leiklutum.
Deil á Facebook
