Eitt gott kappingarvikuskifti farið afturum hjá Sleipnir Ríðingarfelag.
Farna vikuskiftið var skipað fyri tveimum gongulagskappingum.
Fyrst var tað Íslandsrossafelagið ið skipaði fyri Safari FM 2 í Havnadali. Hendan kappingin strekti seg yvir tríggjar dagar. Hósdagin og fríggjadagin vóru innleiðandi kappingar, har fimm tey bestu í hvørjari grein komu víðari og sluppu at kappast á stóra finaludegnum, sum var leygardagin.
Sunnudagin skipaði Vága Ríðingarfelag fyri stuttleika-kapping í høllini vesturi í Vágum, har kappast eisini var í gonguløgum.
Úr Sleipnir Ríðingarfelag vóru tey væl mannaði til báðar kappingarnar. Fleiri ross blivu koyrd millum oyggjarnar hesar dagarnar.
Í heyst 2023 skipaðu Sleipnir Ríðingarfelag fyri undirvísing og próvtøku í BE koyrikorti, ið loyvir koyring við hestavogni. Ikki færri enn 15 bilførarar gjøgnumførdu skeiðið, og hetta sæst nú aftur í rossaflutninginum. Nú eru betri møguleikar at luttaka í felags tiltøkum, kappingum, undirvísing og ikki minnst túrum kring landið.
Tey í Sleipnir Ríðingarfelag fegnast um vaksandi luttøkuna hjá teirra rossum og reiðfólki kring landið – og eru tey sera errin av góðu úrslitunum sum ungdómur teirra klárar at ríða seg til.
Úrslitini frá Safari FM 2:
Birna Jóanesarson og Harka vunnu bronsu í V5
Bergtóra Fagraklett og Fákur vunnu silvur í T7
Simona Tornby og Kiljan vunnu bronsu í V5-børn og silvur í T7-børn
Úrslitini frá kappingini Hjá Vága ríðingarfelag:
Isabella Tornby og Gígur – gull í fet
Lív G. Djurhuus og Dropi – bronsu í fet og trav
Simona Tornby og Kiljan – silvur í tølt og bronsu í lop.
Simona og Kiljan vunnu eisini samreiðs-steypið. Tað bleiv riðið ein seria av valdu gonguløgunum. Dómarirnir høvdu lagt merki til góðu yvirgangirnar millum gonguløgini, og góða samstarvið millum ross og reiðfólk.
Poula og Gígur vunnu silvur í trav og fet.
Har vesturi vóru 10 vaksin og 12 børn sum kappaðust.
Síðani december 2023 hevur Íslandsrossafelagið skipað fyri nógvum góðum og mennandi kappingum fyri yngra reiðfólki, har serliga ungdómurin hjá Sleiånir Ríðingarfelag hevur ment seg nógv. Frá fyrst at tora at melda seg til í einkult gonguløgum, at mennast og vinna heiðursmerkir, til nú at luttaka í torførari greinum, sum V5, har 4 gonguløg verða riðin og próvtøl verða givin í einari roynd á bananum.
Sleipnir Rídingarfelag takka somuleiðis Íslandsrossafelagnum og Vága Ríðingarfelag fyri eitt framúr ítróttarvikuskifti.
Myndir: Sleipnir ríðingarfelag
Deil á Facebook
