Tíðindaskriv/Effo
Effo hevur keypt Hirtshals Marineolie og Hirtshals Fiskernes Handelsselskab. Keypið styrkir støðuna hjá Effo í Danmark og økir bæði oljugoymsluna, veitingarmøguleikarnar og tænastustøðið hjá felagnum.
Effo hevur við virknaði frá 15. september 2026 keypt Hirtshals Marineolie og Hirtshals Fiskernes Handelsselskab.
Keypið verður framt gjøgnum Carl Jensens Marinelager, sum Effo eigur saman við vinnulívsfólkum í Hirtshals. Í sambandi við keypið broytir Carl Jensens Marinelager navn til Effo Danmark, og samlaða virksemið í Danmark verður frameftir rikið undir hesum navni.
Effo hevur longu eitt gott grundarlag í Hirtshals, og við keypinum verður virksemið munandi styrkt. Effo Danmark fær nú størri oljugoymslur í Danmark, bunkringsbátar og tangabilar. Hetta gevur felagnum betri møguleikar at veita kundum eina breiðari og smidligari tænastu bæði á sjógvi og landi. Samstundis skapar samanleggingin møguleikar fyri at gagnnýta førleikar og kapasitet tvørtur um virksemið og við tíðini víðka bæði vøruúrval og tænastur í Danmark.
Gunnar Nielsen, stjóri í Effo, sigur: “Keypið gevur okkum møguleika at byggja víðari á tað góða grundarlagið, sum longu er lagt í feløgunum. Vit hava stóra virðing fyri tí, sum Hirtshals Marineolie og Hirtshals Fiskernes Handelsselskab hava bygt upp gjøgnum árini. Við teirra royndum, tænastum og virksemi fáa vit størri oljugoymslur, bunkringsbátar og fleiri tangabilar. Tað ger okkum enn betur før fyri at veita kundum okkara eina góða og álítandi tænastu.”
Hirtshals er ein týðandi havn fyri bæði fiskivinnu og sjóvinnu, og Effo sær góðar møguleikar fyri at menna virksemið víðari við støði í býnum. Við Effo Danmark verður virksemið savnað undir einum felags navni og einum sterkari grundarlagi.
Um Effo
Effo er eitt føroyskt orkufelag við høvuðssæti í Tórshavn og hevur 250 starvsfólk.
Felagið hevur meira enn 100 ár á baki og kom aftur á føroyskar hendur, tá ið tað varð keypt frá Statoil í 2007. Í 2009 fekk felagið navnið Effo, sum sipar til Føroya Orkufelag.
P/F Effo eigur helvtina av Vindrøkt, sum eigur vindorkuverkið á Gellingarkletti og vindmyllurnar á Mýrunum í Vestmanna. Á Gellingarkletti standa seks Vestas V117-vindmyllur, sum framleiða umleið 100 GWh um árið. Vindrøkt var í 2003 fyrsta felagið at seta upp vindmyllur á handilsligum grundarlagi í Føroyum.
Deil á Facebook
