Hóskvøldið møtast NSÍ og slovenska FC Koper í 2. umfari av Conference League við Djúpumýru í Klaksvík.
Komandi mótstøðuliðið hjá NSÍ er eitt av elstu og mest siðbundnu fótbóltsfeløgunum í Slovenia. Felagið varð stovnað í 1920 og hevur heimstað í havnabýnum Koper (Capodistria) við Adriatarhavið, nær markinum til Italia.
Felagið varð stovnað av studentum, arbeiðarum og fiskimonnum. Felagið hevur skift navn fleiri ferðir. Tá tað varð stovnað í 1920 kallaðist tað Circolo Sportivo Capodistriano. Seinni hevur felagið eisini havt nøvnini; Libertas, Aurora og NK Koper, áðrenn núverandi navnið FC Koper varð tikið í nýtslu.
Heimavøllurin Bonifika Stadion hevur pláss fyri umleið 4.000 áskoðarum og liggur bert fáar hundrað metrar frá Adriatarhavinum.
Koper er einasti veruligi havnabýur í Slovenia. Allur sjóvegis inn- og útflutningur fer gjøgnum havnina í Koper, sum er ein av teimum týdningarmestu við Adriatarhavið.
Gamli býarkjarnin var upprunaliga ein oyggj. Fram til 1800-talið lá Koper á einari lítlari oyggj, men í 1872 varð hann bundin saman við meginlandið við uppfylling.
Koper hevur eina sterka italienska ávirkan. Býurin eitur Capodistria á italskum, og bæði slovenskt og italskt eru almenn mál í kommununi. Í fleiri øldir var Koper eisini undir lýðveldinum Venezia.
Áðrenn Slovenia gjørdist sjálvstøðugt í 1991 spældi Koper í jugoslavisku kappingini. Eftir at landið gjørdust sjálvstøðugt hevur felagið verið eitt av teimum fremstu í slovenskum fótbólti, hóast størstu feløgini í landinum oftast hava verið Maribor, Olimpija Ljubljana og Celje.
Størstu avrikini
Meistaraheitið í 2010 er framvegis størsta ítróttarliga avrikið í søgu felagsins. Meðan felagið eisini hevur vunnið slovensku steypakappingina 4 ferðir og slovensku Super Cup 2 ferðir.
Evropeiska søgan
FC Koper hevur spælt javnan í UEFA-kappingum síðani miðskeiðis í 2000-unum. Flestu luttøkurnar hava verið í Europa League og Conference League-undankappingunum.
Hóast Koper hevur drúgvar royndir í Evropa, hevur felagið ongantíð spælt seg í eitt bólkaspæl.
Núverandi støða
FC Koper hevur aftur tryggjað sær pláss í evropeisku kappingunum og kemur inn í 2. undanumfar í UEFA Conference League, har mótstøðuliðið verður NSÍ.
Liðið er kent fyri tekniskt dugnaligar miðvallarar, eina sterka verju og royndar leikarar úr m.a. Slovenia, Kroatia, Bosnia og Serbia.
Formur
Koper kemur til uppgerðina eftir eina sterka kapping í slovensku landskappingini, sum gav teimum evropeiskt pláss. Í Evropa hava teir ofta vunnið móti feløgum úr smærri fótbóltslondum, men hava eisini havt trupulleikar móti sterkari mótstøðu úr Skandinavia og Miðevropa.
Fyrsta uppgerðin móti NSÍ
Hetta verður fyrsta ferð, at FC Koper og NSÍ Runavík hittast í einari almennari UEFA-kapping.
Skal NSÍ hava ein veruligan møguleika at vinna samanlagt, verður avgerandi at fáa eitt gott úrslit í fyrra dystinum á heimavølli, áðrenn seinni dysturin verður spældur í Koper.
Stuðlað umrøðuni hjá NSÍ í Conference League hava:
Voyt
Runavíkar Kommuna
Navigare
FBS – Føroya Betongsaging
Kiosk Vár
Deil á Facebook
