Tíðindaskriv/ Føroya Bridgesamband
Leygardagin 7. mars 2026 vóru seinastu dystirnir í føroyameistarakappingini fyri lið leiktir í Bridgehúsinum í Gundadali.
Liðið hjá Magna Jøkladal hevði undan seinastu tveimum dystunum vunnið sær eina lutfallsliga trygga leiðslu á umleið 18 stig til annaplássið, meðan leiðslan var heili 64 stig til triðja plássið. Avbjóðingin var tískil at halda fast í oddasessinum í tveimum teimum seinastu umførunum.
Setningurin hjá avbjóðaranum – liðnum hjá Byggitilfar sum lá á øðrum plássinum – var greiður. Skuldu teir gera sær vónir um FM-heitið, so skuldu teir vinna seinastu tveir dystirnar.
Í næstseinasta umfarinum møttust liðini hjá Magna Jøkladal og Rinkuhúsunum, sum lógu ávikavist fyrsta og triðja plássinum, meðan liðið hjá Byggitilfar leikti móti liðnum Rútar 7. Úrslitini háttaðu seg soleiðis, at liðið hjá Byggitilfar vann greiðan sigur á liðnum hjá Rútar 7 (20-0), meðan liðið hjá Magna Jøkladal nakað óvæntað tapti dystin móti liðnum hjá Rinkuhúsunum (5,5–14,5). Hetta hevði við sær at leiðslan hjá liðnum hjá Magna Jøkladal var tódnað niður í 3,5 stig, og tískil var veruligur spenningur íkomin um FM-heitið undan seinasta umfarinum.
Í seinasta umfarinum hittust oddaliðini – liðini hjá Magna Jøkladal og Byggitilfar – í dysti um FM-heitið. Í hálvleikinum hevði liðið hjá Byggitilfar vunnið sær eina rímiliga leiðslu, og lá til at vinna FM-heitið undan seinastu 16 spølunum. Í seinna hálvleiki egnaði liðið hjá Magna Jøkladal at vinna stóran part av muninum inn aftur, og endaliga úrslitið gjørdist at dysturin endaði rættiliga javnur. Liðið hjá Byggitilfar vann dystin tepurt (11-9). Hetta hevði við sær at liðið hjá Magna Jøkladal tryggjaði sær føroyameistaraheitið við 235,5 stigum, meðan liðið hjá Byggitilfar gjørdist nr. 2 við 234 stigum. Ein sera javnur og spennandi endaspurtur um FM-heitið í bridge.
Liðið hjá Magna Jøkladal mannaðu: Magni Jøkladal, Bogi Simonsen, Árni M. Dam,
Símun Lassaberg og Pól Egholm.
Liðið hjá Byggitilfar mannaðu: Dánjal Pauli Mohr, Arne Mikkelsen, Jóannes Mouritsen, Per Kallsberg og Bjarki Ellefsen.
Endaliga støðan í FM-kappingini fyri lið gjørdist hendan:
Nærri útgreining av úrslitunum er at finna á heimasíðuni hjá Føroya Bridgesambandi:
www.bridge.fo
Mynd av liðnum hjá Magna Jøkladal, sum vann gull heiðursmerki í FM lið í bridge. Frá vinstru Magni Jøkladal, Bogi Simonsen, Árni Dam og Símun Lassaberg. Pól Egholm væntar á myndini.
Mynd av liðnum Byggitilfar, sum vann silvur í FM fyri lið í bridge. Frá vinstru Dánjal Pauli Mohr, Arne Mikkelsen, Per Kallsberg og Jóannes Mouritsen. Bjarki Ellefsen væntar á myndini.
Mynd av liðnum Rinkuhúsini, sum vann bronsu heiðursmerki. Frá vinstru Robert Langgaard, Rúni Mouritsen (sum seinastu tvey umførini spældi fyri Eyðun Antoniussen), Dia Jacobsen og Hallberg Arnfridsson.
Deil á Facebook
