Føroya Arbeiðsgevarafelag
Við 13 fyritøkum á eyðsýndum og væl vitjaðum landabási var vinnan aftur í ár væl umboðað á heimsins størstu fiskavørustevnu
Í døgunum 21. til 23. apríl varð Seafood Expo Global hildin í Barcelona. Á føroyska landabásinum, sum hevur verið fastur táttur á stevnuni síðani 1992, tóku 13 fyritøkur lut í ár. Hetta er 32. ferðin, at føroyskur landabásur er á Seafood Expo Global.
Á stevnuni vóru tilsamans 2.300 luttakandi fyritøkur úr 86 londum, og áhugin úr Føroyum fyri at luttaka á 52.950 fermetra stóra stevnuøkinum er vaksandi. Umframt fyritøkurnar á landabásinum vitjaðu fleiri aðrar føroyskar fyritøkur og vinnulívsfólk stevnuna.
Í ár varð føroyski landabásurin millum annað vitjaður av landsstýrismanninum í uttanríkis- og fiskivinnumálum, Bárði á Steig Nielsen, sum hitti og prátaði við allar trettan fyritøkurnar og hinar føroysku fyritøkurnar, sum luttaka á egnum bási.
Fyritøkurnar, sum mannaðu føroyska landabásin í ár, vóru Bakkafrost, Enniberg, Hiddenfjord, JFK, Kósin, Landshandilin, Maresco, North Pelagic, Pelagos, PRG, Rainbow Seafood, Vaðhorn og Varðin Pelagic.
Tað var Menningarstovan, sum samskipaði landabásin fyrstu árini, men seinastu árini hevur Vinnuhúsið havt ábyrgdina. Soleiðis var eisini í ár. Aftur í ár gjørdi og sniðgav lýsingafyritøkan Sansir tann 428 fermetra stóra básin, sum tryggjaði eina professionella og eyðsýnda føroyska umboðan.
Seafood Expo Global byrjaði sum ein lítil stevna í belgiska høvuðsstaðnum Brússel, men flutti seinni til Barcelona. Stevnan er partur av altjóða Seafood Expo-røðini, sum Diversified Communications skipar fyri í Norðuramerika, Evropa og Asia.
Deil á Facebook
