Mynd: Ólavur Larsen
Lesarabræv
Prísurin á gerandisvørum er farin upp í loft uppá onga tíð, meðan lønarútgjaldið ikki fylgir við. Hetta ger tað sera trupult hjá nógvum barnafamiljum, einligum forsyrgjarum og hjá lág- og miðalløntum, at fáa gerandisdagin at hanga saman fíggjarliga. Ein góður og simpul máti at lætta um hjá hesum er, við at avtaka og lækka MVG’ið á nøkrum útvaldum gerandisvørum.
Føroysk framleiðsla fyrst
Tað fyrsta sum skal gerast er, at avtaka MVG’ið á føroyskari mjólk, smøri og møguliga jogurti. Eisini skal MVG’ið takast av grønmeti, frukt, breyði og møguliga blæum. Um tað ikki er ov torført at gera mun á føroyskt framleiddum vørum og innfluttum vørum, so skulu føroysku vørurnar hava eina størri MVG lækking, tó loyvi eg mær at ivast í um hetta letur seg gera í praksis. Eg haldi tað er umráðandi, at vit fyrst og fremst leggja lunnar undir tí føroysku framleiðsluni, so vit stuðla uppundir okkara egnu framleiðslu, og harvið innflyta minni og framleiða meir her á landið. Vit skulu eisini hyggja eftir, hvussu vit kunnu gera sømdirnar betri hjá bóndunum og hjá øðrum rávøruframleiðarum, so tað verður enn meir framleitt í Føroyum og minni innflutt. Tað er ein vinn – vinn støða!
Ólavur Larsen
Valevni fyri Javnaðarflokkin
Deil á Facebook
