Eftir 19 ára bíðitíð kann NSÍ aftur kalla seg føroyameistara á manssíðuni. Petur Knudsen skoraði avgerandi málið, tá ið hann javnaði til 1–1 í 84. minutti móti HB og tryggjaði felagnum FM-heitið við Løkin í dag.
Spenningurin helt sær til seinastu løtuna, men seks minuttir fyri vanliga leiktíð var Petur Knudsen á rætta staðnum. Við útjavnandi málinum tryggjaði hann NSÍ stigið, sum skuldi til fyri at staðfesta meistaraheitið.
Hetta er annað FM-heitið hjá besta mansliðnum hjá NSÍ. Fyrsta meistaraheitið kom í 2007, og nú, 19 ár seinni, stendur felagið aftur ovast í føroyskum fótbólti.
Undan avgerðini hevur gulur fótbóltsfepur merkt eystara arm á Skálafjørðinum. Leikararnir hava vitjað skúlar á Glyvrum og við Løkin, har børnini hava sungið, sett spurningar og víst sín stuðul.
Nú kunnu bæði børn og vaksin fegnast um, at vónin er vorðin veruleiki. FM-steypið skal aftur til Runavíkar, og málið hjá Peturi Knudsen fer at standa sum ein serlig løta í søgu felagsins.
NSÍ boðar frá, at frá kl. 19 er opið hús í Bylgjuni har øll eru vælkomin.
Deil á Facebook
