Summarið er farið afturum og fyrsti heystardagur hevur longu verið. Besta nátatíð er og hópin av bátum eru úti og royna at fáa sær nakrar nátaungar.
Og rokast verður mest sum í øllum bygdum, bæði í hjallum, neystum og kjallarum, runt landið, har menn og kvinnur, hagreiða fuglin sum er komin til høldar.
Á kaiøkinum á Toftum, í einum av neystunum omanfyri fiskavirkið Nykur, er einki undantak.
Eysturoyarportalurin hitti í dag Rúna í Hjøllum, sum saman við soninum og øðrum hava verið fleiri túrar seinastu dagarnar.
Tá ið vit hittu teir vóru teir í ferð við m.a at svíða og royta.
Rúni sigur, at teir hava verið fleiri túrar og hava fingið uml. 300 nátar hvørja ferð. Teir hava verið mest norðanfyri, sigur hann.
Hann sigur, at fuglurin er væl fyri og støddin er góð. Tað hevur verið sera nógvur fuglur at sæð hesar dagarnar, og at teir ætla sær at gera nakar túrar afturat, sigur hann at enda.
Myndir: Eysturoyarportalurin
Deil á Facebook
