Fyritøkan SMJ vann verkætlanarkappingina at útbyggja farstøðini í Vága Floghavn.
SMJ sigur soleiðis:
Vit hava fingið víst tað stóra álit at menna framtíðar farstøðina í Vága Floghavn.
Vit hjá SMJ eru takksom fyri at hava vunnið heiðurin at vera høvuðsráðgevi til útbyggingina av farstøðini í Vága Floghavn. Hetta er ein stór og týdningarmikil verkætlan, ið vit fara undir við virðing, ábyrgd og virkisfýsni.
Afturat okkum hava vit eitt sterkt tvørfakligt ráðgevaratoymi:
• ZESO Architects við nógvum royndum innan flogvallar-arkitekturi
• KONTRAST við stórum kunnleika til føroyska byggimentan
• SPENN við royndum frá øðrum flogvallarverkætlanum og serligum kunnleika til byggikonstruktiónir
• NIRAS við drúgvum royndum og dugnarligum serfrøðingum
Saman hava vit lagt dent á at skapa eina farstøð, ið bindur tað nýggja og tað verandi saman – bæði arkitektoniskt og funktionelt. Ein farstøð, ið avspeglar føroyska mentanararvin, og samstundis er opin móti útheiminum.
Vit hava lagt dent á at ferðaupplivingin tekur støði í tí einstaka ferðandi – við fokus á rúm, ljós, náttúru og teimum løtunum, ið hava týdning: fráferðin og móttøkan – frá tryggleika til vit hittast aftur.
Vit gleða okkum at fara undir arbeiðið í tøttum samstarvi við Vága Floghavn, Ráð og øll, ið fara at nýta hesa framtíðar farstøð.
Myndir: SMJ
Deil á Facebook
