Tað hevur verið eitt sindur óvist við Gunnar Vatnhamar seinastu dagarnar.
Fyrr í morgun frættist í onkrum miðli, at Gunnar Vatnhamar ikki fór at verða tøkur til steypafinaluna í Íslandi, sum verður leikt í morgin á Laugardalsvøllinum.
Men Gunnar Vatnhamar er í Íslandi. Og er tøkur til dystin í morgin. Hetta váttar hann fyri Eysturoyarportalinum.
-Eg havi verið í Føroyum síðani mikumorgunin, tí at møguleiki var fyri, at unnustan skuldi føða ov tíðliga. Men nú sær alt út til at vera stabilt, og eg eri tí í mogun komin aftur til Íslands, har eg fari at venja seinni í dag, soleiðis at eg eri púra klárur til finaluna í morgin.
Steypfinalan er millum Víkingur Reykjavík og KA Akureyri og verður leikt á Laugardalsvøllinum sum er tjóðleikvøllinum í Íslandi.
Dysturin byrjar kl. 17.00 føroyska tíð og kann síggjast á rásini RUV á Televarpinum.
Deil á Facebook
