Bogaskjótisamband Føroya
Ein fjórðingsfinala hjá compound-monnunum mátti avgerast við shoot-off, og tað var tætt í einari hálvfinalu, men annars var ikki tann heilt stóri spenningurin í kappingunum, tá FM í uttandura bogaskjóting var í Hoydølum í dag. Lilja Strøm Winther vann gull hjá kvinnum við berboga, Pernille Krogh hjá recurve-kvinnunum, Hans Petur Højgaard hjá recurve-monnunum, Anja Eydnudóttir hjá compound-kvinnunum og Jóannes Poulsen hjá compound-monnunum
Kappingin um føroyameistaraheitið í uttandura bogaskjóting hevur verið í Hoydølum í dag, og tað gekk væl at avgreiða kappingina, tó at tað var eitt lot.
Unga Lilja Strøm Winther úr Team SuðurSkoti royndi seg fyri fyrstu ferð í kapping uttandura, hon var tó einsamøll við berboganum, so tað var greitt frammanundan, at hon vann FM-gullið. Í øllum hinum bogaflokkunum var lagt upp til kapping um heiðursmerkini, men hjá recurve-monnum, har tveir skjúttar vóru teknaðir, fekk annar forfall, so Hans Petur Højgaard úr Ørvi hevði tryggjað sær gullið, áðrenn hann skeyt síni innleiðandi umfør.
Kvinnur berbogi: Lilja Strøm Winther, Team SuðurSkot, gull
Menn recurve: Hans Petur Højgaard, Ørvur, gull
Í hinum bólkunum skuldu hólmgongur til, áðrenn vinnararnir vórðu funnir. Hjá recurvekvinnunum bleiv tað tó næstan solo-skjóting hjá Pernille Krogh úr Vágaskoti, tá einasta mótstøðukvinnan, dóttirin Tóra Dinna Reynskor, fekk ilt í armin longu í innleiðandi kappingini og mátti kasta frá sær í finaluni. Pernille vann innleiðandi kappingina stórt og finaluna uttan mótstøðu.
Í compound-kappingini hjá kvinnum vóru Rakul Dam úr Tambum og Anja Eydnudóttir úr Vágaskoti einsamallar. Her vann Anja trygt bæði innleiðandi kappingina og finaluna.
Kvinnur recurve: Tóra Dinna Reynskor, silvur, og Pernille Krogh, gull
Hjá compound-monnunum var meira spenningur í. Ikki færri enn seks skjúttar kappaðust hesa ferð. Rógvi Mohr úr Tambum, sum ikki hevur skotið í fleiri ár, var við aftur, og eisini Albert Dam úr Ørvi, ið hevur skotið ser lítið seinastu árini. Hinir fýra hoyra til aktivu kjarnuna av compound-skjúttunum: Jóannes Poulsen, Nikkel Petersen og Sámuel T. Petersen, allir úr Ørvi, og Jógvan Niclasen úr Tambum.
Størsti spenningurin í hesi kappingini var í fjórðingsfinaluni millum Albert og Jógvan. Eftir tey fimm umførini stóð á jøvnum 134 – 134, og tí mátti fjórðingsfinalan gerast av við shoot-off. Báðir raktu 10’aran, men Albert var nærri miðjuni og tryggjaði sær tískil hálvfinaluplássið.
Albert Dam og Jógvan Niclasen máttu avgera fjórðingsfinaluna við Shoot-off. Báðir raktur 10’aran, men pílurin hjá Alberti var eitt vet nærri miðjuni, so hann vann seg víðari í hálvfinaluna
Bronsu- og gullfinalurnar verða skotnar
Hin fjórðingsfinalan var millum Sámuel og Rógva, og hana vann Sámuel 136 – 121.
Jóannes og Nikkel høvdu vunnið seg beinleiðis í hálvfinalurnar við at blíva ávikavist nummar eitt og nummar tvey í innleiðandi kappingini.
Onnur hálvfinalan stóð millum Jóannes og Albert, og hana vann Jóannes 138 – 129. Hin var millum Sámuel og Nikkel, og har var bæði tætt og spennandi. Tá av tornaði, var Sámuel omaná og vann hálvfinaluna 142 -141.
Í hólmgongunum um heiðursmerkini vóru úrslitini rættiliga greið. Nikkel vann bronsudystin móti Albert 144 – 135, og Jóannes vann gullfinaluna móti Sámuel 141 – 132.
Compound menn: Sámuel Petersen, silvur, Jóannes Poulsen, gull, og Nikkel Petersen, bronsu
Úrslitini:
Kvinnur berbogi
Innleiðandi og endaligt:
Lilja Strøm Winther, Team SuðurSkot, 125+85 = 210.
Kvinnur recurve
Innleiðandi:
Pernielle Krogh, Vágaskot, 281+268 = 549.
Tóra Dinna Reynskor, Vágaskot, 245+0 = 245.
Finala:
Pernille – Tóra Dinna, 6 – 0.
Menn recurve
Innleiðandi og endaligt:
Hans Petur Højgaard, Ørvur, 294+287 = 581.
Kvinnur compound
Innleiðandi:
Anja Eydnudóttir, Vágaskot, 311+302 = 613.
Rakul Dam, Tambar, 232+254 = 486.
Finala:
Anja – Rakul, 128 – 79.
Menn compound
Innleiðandi:
Jóannes Poulsen, Ørvur, 345+351 = 696.
Nikkel Petersen, Ørvur, 338+332 = 670.
Sámuel T. Petersen, Ørvur, 334+324 = 658.
Jógvan Niclasen, Tambar, 331+321 = 652.
Albert Dam, Ørvur, 313+308 = 621.
Rógvi Mohr, Tambar, 287+298 = 585.
Fjórðingsfinalur:
Albert – Jógvan, 134 – 134; shoot-off, 10+ – 10.
Sámuel – Rógvi, 136 – 121.
Hálvfinalur:
Jóannes – Albert, 138 – 129.
Sámuel – Nikkel, 142 – 141.
Bronsufinala:
Nikkel – Albert, 144 – 135.
Finala:
Jóannes – Sámuel, 141 – 132.
Deil á Facebook
