Tað er besta nátatíð, og tað merkist eisini hjá bjargingartænastunum kring landið.
Ikki minni enn 5 útróðrarbátar og eitt línuskip hava biði um sleip seinastu dagarnar.
Fríggjadagin fekk MRCC fyrst boð um, at eitt línuskip, sum var statt vestur úr Mykinesi, ynskti sleip. Tjaldrið kom á staðið og sleipaði skipið til Tórshavn.
Sama dag var ein smábátur á nátaveiðu norðanfyri, sum boðaði frá maskinbreki og ynskti sleip. Rescue Vón fór avstað og sleipaði bátin til Eiðis.
Sama dag var ein smábátur uppsteðgaður, hesuferð vestanfyri Sandoynna. Rescue Sverri fór avstað og sleipaði bátin til Miðvágs.
Í gjár, leygardagin, vóru aftur boð eftir MRCC. Fyrst var tað ein smábátur sum var uppsteðgaður norðanfyri. Rescue Vón fór avstað og sleipaði bátin til Leirvíkar.
Síðani var ein útróðrarbátur uppsteðgaður í Skopunarfirði. Rescue Lív sleipaði bátin til Havnar.
Og síðani var tað ein útróðrarbátur, sum staddur vestanfyri Gásadal, sum eisini var uppsteðgaður. Tjaldrið setti Nósa út, og hann fór avstað og sleipaði bátin inn á Sørvág.
Deil á Facebook
