Leita á eyp.fo
Ongi úrslit
Undanfarna síða
Leiting av
Næsta síða
21.11.2026 19:16

Katrin fekk 30 tons av brislingi í einum kasti (Myndir)

Mynd: Eyp.fo

Nótabáturin Katrin kom tíðliga seinnapartin í dag inn á Norðragøtu við umleið 30 tonsum av brislingi. Øll veiðan fekst í einum kasti á Gøtuvík.

Manningin á Katrin royndi eftir brislingi á Gøtuvík í dag. Eitt kast var nóg mikið til at fáa tey umleið 30 tonsini, sum báturin hevði við sær inn á Norðragøtu. Hesuferð var brislingurin nakað minni enn onkuntíð fyrr verður upplýst.

Katrin FD 771, er heimahoyrandi í Søldarfirði. Stálbáturin er bygdur í 2009, er 13,6 metrar langur og er í reiðarínum Sp/f Katrin. Báturin hevur í ár royndarloyvi eftir brislingi og fjarðasild. 

Í november í fjør royndi Katrin eisini á Gøtuvík og landaði tá umleið 40 tons av brislingi í Norðragøtu. Tann veiðan fór til Tavuna í Leirvík, har brislingurin varð marineraður og koyrdur í tunnur. 

Myndir: Eysturoyarportalurin

Les eisini: Fullfermdur inn við brislingi (Myndir)