Vinnuhúsið
Nærum 400 luttakarar vóru við á Vinnudegnum, sum verður aftur 17. september næsta ár
Fríggjadagin í farnu viku varð árligi Vinnudagurin hildin í Norðurlandahúsinum. Nærum 400 fólk úr vinnulívinum og onnur áhugað vóru savnað til ein innihaldsríkan dag við framløgum, kjaki og íblástri.
Á Vinnudegnum møtast vinnulívsfólk, politikarar og onnur áhugað til at skifta orð, knýta sambond og fáa nýggjan íblástur úr framløgum og kjaki um viðkomandi evni.
Eitt fast innslag á skránni eru heiðurslønirnar Ársins Virki og Vinnuátakið. Í ár fóru tær til ávikavist Smyril Line og Ress spa.
Vit ynskja báðum hjartaliga til lukku við heiðrunum.
Bæði útlendskar og føroyskar røddir vóru á pallinum gjøgnum dagin. Vit takka hjartaliga Claus Søberg Larsen, Ole Hammer, Christina Boutrup, Jaspur Højgaard, Tóra Slættalíð, Kristian Eli Zachariasen, Robert Sivertsen og Dianu Gilstón fyri framløgurnar og íblásturin.
Fult hús var í Norðurlandahúsinum, hýrurin var góður, og framløgurnar vóru fjølbroyttar. Stóri áhugin vísir, at tørvurin á at møtast tvørtur um vinnugreinar, skifta orð og saman hyggja at møguleikunum frameftir er stórur.
Niðanfyri eru myndir frá Vinnudegnum 2026:
Myndir: Vinnuhúsið
Deil á Facebook
