(grein í Vespuni leygardagin 20. juni 2026)
Tað eru kommunur við stórum felagshúsum, ið hava ætlanir og dreymar um innandura fótbóltshøll. Og so er tað Runavíkar Kommuna. Eg hugsi, at hesin kritikkurin fer til tey seinastu 5-6 býráðini, ið hava sitið. So er kritikkurin kanska lættari at bera. Og eg kann taka mín part sjálvur.
Tað hevur ómetaliga stóran týdning fyri eitt fótbóltsfelag, at man hevur eitt felagshús. Sum er, so heldur besta mansliðið til í kjallaranum, kvinnurnar í kontainarum, børnini í Bylgjuni og onnur fáa sær kaffi í kioskini. Trupulleikin er, at talan er ikki um ein samlaðan felagsskap, ið dagliga gongur í somu hølum. Tað er einki natúrligt tilhaldsstað.
Hvønn týdning hevur hetta so? Man kann ikki beinleiðis siga, at hetta ger, at tað ikki ber til at spæla fótbólt. Men mítt uppáhald er, at í longdini hevur hetta sera stóran týdning fyri samleikan hjá NSÍ. NSÍ er fyri so vítt heimleyst. Og tað er rættiliga sigandi, at tey einastu feløgini, ið einki felagshús hava, bæði eru at finna í Runavíkar Kommunu. Hetta er simpulten bara ikki blivið raðfest. Onnur feløg, ið vit kappast við, hava havt eitt felagshús í áratíggju.
Nóa Ørk
Royndin at byggja eitt nýtt hús sunnanfyri vøllin verður skemtiliga kallað Nóa Ørk. Tað var fyribils húsið omaná stoyptu grundini, ið fekk fólk at hugsa um Nóa Ørk. Tað er kanska eitt nokkso sigandi navn, nú ein roynd varð gjørd at bjarga NSÍ nøkur umklæðingarrúm. Tað hevur gingið ógvuliga seint, hóast politisk semja og lyfti varð givið um at byggja umklæðingarrúmini beinanvegin. Hetta lyftið varð so ikki hildið.
Tað sær heldur ikki út til at nývalda býráðið – ið ikki er so nývalt longur – ætlar at skunda undir hesa ætlanina. Onkur býráðslimur, ið eg helt fór at arbeiða fyri einum NSÍ-húsi, hevur meira snakkað um at bróta niður, heldur enn at byggja upp.
Er hetta ein góð og endalig dreymaloysn? Nei, als ikki, men hendan loysnin kann gerast fínasta slag, um vit gera hana lidna.
Eitt Evropa-cup stadion á niðaru síðu?
Fyri eftirhondini nógvum árum síðani varð eitt sera flott og stórt stadion teknað á allari niðaru síðuni. Tað varð lagt fram fyri áhugaðum fólkum. Tað var flott, stórt og kundi rúma øllum evropa-cup krøvum, einum frítíðarskúla, eini matstovu, kontórum, umklæðing, fitness og so framvegis. Ja, um tú byggir alla langsíðuna í tveimum hæddum, so hevur tú fleiri túsund fermetrar. Ein dreymur. Men var hetta eitt ynski ella eitt krav frá NSÍ? Hevur NSÍ hendan tørvin ella lokkaði onkur NSÍ at droyma?
Eg kann í øllum førum staðfesta, at hendan ætlanin bara hevur verið brúkt ímóti NSÍ. Skal NSÍ byggja fyri 80 mió?! Hvat skulu hini so hava? Var tað ætlanin við tekningini?
Runavíkar Kommuna skal í núverandi støðu sjálvandi raðfesta annað enn eitt dýrt evropa-cup stadion a la Klaksvík á langsíðuni, sum NSÍ nokk ongantíð hevur sett krav fram um. Tað besta hevði nokk verið at bygt í stigum á langsíðuni, men tann ætlanin varð skotin so langt út til innkast, at hon liggur nokk á Toftum. Kommunan hevur nokk at brúka pengar til. Nýggi Glyvra Skúli kostar eini 3-400 mió og innkomuvegurin má eisini gerast liðugur.
Men hví steðgaði semjan um at byggja eina góða fyribils- ella millumloysn sunnanfyri púrasta upp?
Áheitan
Góðu býráðslimir, ið ynskja NSÍ nøkulunda virðilig hølisviðurskifti. Fái nú teknaðu loysnina á suðursíðini í gongd aftur. Hon er vøkur og praktisk. So kunnu vit altíð droyma víðari um ambitiøsu loysnina á niðaru síðu.
Vit eru ikki heilt heimleys, tí vit hava altíð fantastiska stemningin við Løkin. Okkara heim er vøllurin við Løkin, men vit vilja so gjarna hava eitt felagshús!
Saman standa vit sterk.
Sonni L. Petersen
Deil á Facebook
