KJ
Tá fyrstu RO-skipanirnar frá KJ komu til Grønlands í 2025, var talan um eitt týdningarmikið stig fyri vatnveitingina í fleiri smábygdum. Føroyska fyritøkan KJ vann tá útboðið at veita fimm RO-skipanir til Nukissiorfiit, og SMJ stóð fyri projekteringsarbeiðinum og útboðnum.
Hetta er ein sólskinssøga, har miðvíst arbeiði frá føroyskari projekteringsfyritøku viðførir at ein føroyskur veitari hevur møguleika at luttaka í útboðum, og í hesum føri eisini vinnur útboðið, í harðari kapping við útlendskar veitarar. Nú, eitt ár seinni, er samstarvið víðkað – fleiri skipanir eru á veg. Í vikuni skrivaðu Nukissiorfiit og KJ undir sáttmála fyri tríggjar RO-skipanir afturat til Grønlands, har ein av skipanunum fær fast stað í einari av mongu bygdunum.
Í einum landi, har bygdirnar kunnu vera fjarskotnar og ofta torførar at koma fram til, er reint vatn ikki altíð ein sjálvfylgja. Tá er RO tøknin sera góð til endamálið at reinsa sjógv til reint drekkivatn. Veðurlag, frástøða og avmarkað infrakervi gera, at nýhugsandi loysnir eru neyðugar. Tí eru RO-skipanirnar sera væl egnaðar til grønlendskar umstøður. Eindirnar eru lættar í vekt, soleiðis at tær kunnu flytast við tyrlu beinleiðis til smáar og fjarskotnar bygdir. Hetta ger tað møguligt at tryggja vatnveiting har sum hvørki vegir ella havnir gera tað lætt at flyta størri skipanir og útgerð.
RO-tøknin reinsar sjógvin og ger tað trygt at drekka, og drekkivatn er ein grundleggjandi treyt fyri heilsu og trivnaði. Fyri familjur í smáum bygdum merkir tað størri trygd í gerandisdegnum og betri lívskor. Nýggja avtalan í 2026, sum Nukissiorfiit og KJ hava gjørt, er tí meira enn ein handilslig avtala. Hon er ein íløga í fólk, í heilsu og í framtíðina hjá grønlendskum samfelagnum – og samstundis eitt dømi um, hvussu føroyskur kunnleiki kann gera mun í Norðuratlantshavi.
Deil á Facebook
