Røðan hjá borgarstjóranum í Fuglafjarðar kommunu, Dávur Juul, tá ið nýggi sløkkiliðsbilurin bleiv handaður í dag.
Góðu tit øll.
Í dag er ein stórur dagur hjá tykkum í brandliðnum og okkum fuglfirðingum, nú vit fáa ein nýggjan brandbil, sum avloysara fyri 35 ára gamla ellisakfarið, sum tá ið tíðini, var eitt stórt frambrot hjá Fuglafjarðar brandliðið og á Føroya landi.
Eg minnist gott frá tíðini tá, hvussu nógv bleiv tosað um hendan bil og stóra motorin, um eg minnist rætt 400 hk, sum tá var óhoyrt til ein brandbil.
Ynski um stóra motorin kom frá brandmeistarinum Gordon Petersen.
Eg haldi meg kunna siga frá brandleiðara og brandfólki, at tað var ein røtt avgerð, sum hann tá tók.
Krøvini og sløkkiútgerð broytast alla tíðina og nógv er broytt síðani brandliðið byrjaði fyri áleið 55 árum síðani. Eg meini tað var stovnað tann 22. februar í 1971.
Tann fyrsta sløkkiútgerðin var ein brandpumpa.
2 ár seinni keyptu teir fyrsta brandbilin, saman við Gøtu og Leirvík.
Tann bilurin stendur í dag í hølunum hjá Ellisakførum.
Síðan fyrsta brandpumpan bleiv keypt í 1971 er nógv hent.
Útgerðin er blivin nógv betri, venjingin meira skipa og avbjóðandi.
Men tað, sum veruliga ger Fuglfjarðar Sløkkilið so serligt, er ikki bara bilarnir, pumpurnar ella bjargingarútgerðin. Tað eru fólkini.
Tað eru tit, sum fara avstað, tá boðini koma yvir alarmsentralin ella aðra vegir.
Tit renna inn, – tá onnur renna út.
Tit standa saman sum eitt lið — eisini tá logarnir standa høgt.
Tað er ikki bara eldur, tit sløkkja.
- Tit skapa tryggleika.
- Tit skapa ró.
- Tit skapa vón.
Vit kunnu eiga flott hús, góðar vegir og vakurt útsýni.
- Men uttan tryggleika —
- Uttan fólk, sum taka ábyrgd —
- Eigur ein býur onki.
Sum eg havi nevnt omanfyri, er umráðandi at fylgja við í tí, íð hendir innan sløkking og tryggleika.
Hesin bilur, sum eg í dag komið at handað til brandliðið, hevur í nógv ár verið á ynskilistanum hjá brandliðnum. Og á heysti í 2023 tók býráðið avgerð um at seta pening av á fíggarætlanina fyri 2024 og 2025, áleið 2 mió hvørt ár. Bilurin kostar knappar 4 mió, nú hann stendur klárur at tæna okkum.
Bilurin er ikki keyptur, sum ein hyllvøra, men er uppbygdur og útgjørdur í tøttum samstarvi við brandmeistaran og seljarin/uppbyggjaran.
Eg kann leggja afturat, at bilurin er vístur fram á eini messu í Italia.
Tað borgar fyri, at seljari og uppbyggjara eru væl nøgdir og stoltir av bilinum.
Bilurin er útgjørdur við nýmótans klippiútgerð, 3.000L tanga, vatnkanón, spælið, skúmanleggið og aðrari hentari útgerð.
Motor orkan er 540 hk.
Vónandi kemur bilurin at tæna tykkum, og okkum borgarum gott.
Hjartaliga tillukku við bilinum.
Við hesum fáu orðum farið eg at handa Brandmann Jan, lyklarnar til bilin.
Deil á Facebook
