Løgtingið
Í oktobur mánaði luttók Steffan Klein Poulsen, løgtingsmaður fyri Miðflokkin, sum umboð fyri Løgtingið, á ST-aðalfundinum í USA.
Um túrin greiðir Steffan Klein Poulsen soleiðis frá:
“Leiðin gekk fyrst til Washington D.C. har vit eitt nú fingu innlit í politikkin hjá Trump stjórnini, Heimsbankan og tankasmiðjur. Harumframt fingu vit eisini høvið at hitta fólk í kongressini.
Tá ið vit komu til New York, varð ST miðdepilin. ST er ein stórur alheimsfelagsskapur við sera nógvum undirgreinum. Har fingu vit innlit í, hvussu ST er skipað, og hvussu tey arbeiða fyri at náa teimum málum, sum limalondini blíva samd um.
Tað skerst tó ikki burtur, at stórar ósemjur eru í ST. Ósemjurnar snúgva seg bæði um, hvat dagsskráin skal innihalda, og hvussu ST skal skipast frameftir. Hetta hevur ført við sær, at fleiri lond, eitt nú USA, ikki rinda sítt limagjald. Tað hevur sett ST í gjaldføristrupulleikar. Sparingar og ein øðilig togtogan um hugtøk sum veðurlag og kyn vóru tí nøkur av høvuðsevnunum á túrinum.
At enda, so slepst ikki uttan um at nevna Trygdarráðið, sum er háaktuelt, nú so nógvar ósemjur og kríggj eru kring heimin. Tað var tí sera áhugavert at fáa innlit í Trygdarráðið.”
Á hvørjum ári sendir Løgtingið tveir løgtingslimir til ST-aðalfund. Hesir luttaka, sum partur av donsku sendinevndini. Beinir Johannesen, løgtingsmaður fyri Fólkaflokkin, luttók til fyrra ST-aðalfundin, sum var í septembur mánaði í ár.
Deil á Facebook
