Tíðindaskriv/ Bíbliuskúlin Keldan
Tað er við takksemi og spenningi, at Bíbliuskúlin Keldan (BSK) nú letur upp fyri umsóknum um upptøku á dagbíbliuskúlanum fyri skúlaárið 2026/2027. Hetta er ein stórur varði í søguni hjá BSK. Síðan skúlastovnan í 2021 hava skeið verið hildin um kvøldið og leygardagar.
BSK sum dagskúli byrjar 1. september 2026 og endar fyrsta skúlaárið 28. mai í 2027.
Undirvísingarnar vera fyrrapartar gerandisdagar. Sostatt ber til at ganga á BSK og samstundis arbeiða seinnapartin.
Á skúlanum eru nógvir ymiskir lærarar, sum tó hava til felags hetta greiða mál: at hjálpa næmingunum at vaksa andaliga og gera teir búnar at tæna í Guds ríki.
Á leið 30 ymisk undirvísingarevni eru á skrá í skúlaárinum. Eittnú Guds persónleiki, Bíblian, gamla og nýggja testamenti, leiðsla, vekingarsøga, bøn, kristin heimsáskoðan.
Á BSK fáa næmingar ein framúr møguleika at brúka tíð saman við Jesusi í einum umhvørvi, sum leggur dent á bíbliutrúgva undirvísing í Heilaga Andans nærveru og í tilbiðjan.
Málbólkurin er øll trúgvandi í Føroyum, sum ynskja at vaksa andaliga og tæna í Guds ríki.
Á bsk.fo er meira kunning um BSK og dagskúlan, og til ber longu nú at søkja um upptøku á bsk.fo.
Myndir: Bíbliuskúlin Keldan
Deil á Facebook
